DobrodošliNa prostoru između planina Bjelasice, Sinjajevine i Prošćenskih planina, nacionalnih parkova ,,Biogradska gora“ i ,,Durmitor“, na obali najljepše evropske rijeke Tare, nalazi se Mojkovac, oaza prirodnih ljepota. Ovdje vas očekuje skoro netaknuta divlja priroda, bogat biljni i životinjski svijet, usamljena planinska sela i spokojni život u katunima. Isplati se otkriti, doživjeti i uživati u najbolje čuvanoj planinskoj tajni. Možete se radovati potpunom užitku u prirodi, uvijek u kombinaciji sa avanturističkim duhom i srdačnim gostoprimstvom. Na relativno malom prostoru, možete upoznati jedinstvene pejzaže šuma i livada, planinskih vrhova niz čije se obronke pjenušaju čisti planinski potoci.
Kulturno-istorijsko nasleđe čine arheološki lokaliteti srednjovjekovnog Brskova, sakralni spomenici, moderni objekti, tradicionalne seoske kuće, katunska naselja...
Skoro milenijumsko trajanje na prostoru koji je samo priroda mogla da podari ostavilo je tragove materijalne i duhovne kulture. Sa tradicionalnim nasleđem i modernim dostignućima možete na svakom koraku osjetiti spontanu srdačnost domicilnog stanovništva, koje i te kako zna sresti, ugostiti, sprijateljiti se i ispratiti drage goste.
Zanimljivosti
Interesantna je legenda o Zabojskom jezeru, tj. o njegovom postanku. Kažu kada su nečastivi vladali ovom prirodom nastao je krvav rat oko prevlsti na livadi gdje se danas nalazi jezero. Pošto je dan bio oblačan, Sveti Ilija je tjerao svoje vatrene kočije nebom iznad Sinjajevine. Kada je ugledao nečastive razgnjevio se i jednim udarcem groma sve ih pobio, a livadu pretvorio u jezero u kojem se danas nalazi bistra voda „po kojoj plovi riba svakojaka, kad god hoćeš da je taze jedeš“. Odlazeći na vatrenim kočijama nebesima Sv. Ilija reče: „Ovo vam je ZA-BOJ“, od čega je izvedeno ime jezera Zaboj.
Idejni projekat razvoja Bjelasice je ekološki opravdano i održivo rješenje. Ovaj prostor, budući da je izgrađen od klastičnih stijena, obiluje izvorima (čak i na 1.800m.n.v.) što otvara mogućnost pravljenja vještačkog snijega.
Od kraljevih riječi, moj kovani novac, izveden je naziv današnjeg grada Mojkovac. Grad se razasuo uz obalu ,,Suze Evrope“ u njenom proširenju u blizini ruševina poznatog srednjovjekovnog trgovačkog i rudarskog grada Brskovo u kojem je još u 13 v. Kovan prvi novac – brskovski groš.